Gopal Dahal

गृहपृष्ठ हेड नेपालको आवासीय स्रोत केन्द्रको उद्घाटन

हेड नेपालको आवासीय स्रोत केन्द्रको उद्घाटन

जिल्लामा अपाङ्गता क्षेत्रमा काम गर्ने गैरसरकारी संस्था हिमाली शिक्षा र विकास हेड नेपालले पहिलोपटक आवासीय स्रोत केन्द्र भवनको उद्घाटन गरेको छ । संस्था स्थापना भएको १० वर्षको अवसरमा आयोजना गरिएको वार्षिक उत्सव कार्यक्रममा संस्थाले भूकम्प प्रतिरोधी अपाङ्गतामैत्री एक तले पक्की भवनको एक कार्यक्रमका बीच बुधबार उद्घाटन गरेको हो । जिल्ला समन्वय समितिका प्रमुख दानबहादुर रावतको प्रमुख अतिथ्यमा उद्घाटन भएको हेड आवासीय स्रोत केन्द्र संस्थामा आश्रय लिएर बसेका बलाबालिकाले गाँस, बाँस र शिक्षा पाउने भएका छन् ।

संस्था दर्ता भएको एक दशक पुगेको अवसरमा ‘एक दशकमा निर्माण भयो दीर्घकालीन भविष्यको आधार, अझै गर्नु छ लक्ष्य हासिल अनि सपना साकार’ भन्ने नाराका साथ गएको वर्षदेखि शुरु भएको स्रोत केन्द्रको एक तला निर्माण गरिएको संस्थाका कार्यकारी निर्देशक छिटुप लामाले जानकारी दिनुभयो ।

विसं २०६७ मा हुम्ला जिल्ला प्रशासन कार्यालयमा दर्ता भएको संस्थाले जिल्लाका अपाङ्गता भएका बालबालिकाको शिक्षा र स्वास्थ्य क्षेत्रमा काम गर्दै आएको छ । उनीहरुको क्षमता विकास गर्नका लागि निर्माण भएको स्रोत केन्द्र रु ७१ लाख २० हजार ५१० रुपैयाँ दुई पैसा लागेको कार्यक्रमका अवसरमा निर्देशक लामाले जानकारी दिनुभयो । उहाँका अनुसार, भवन निर्माण गर्न कर्णाली प्रदेश सरकारले रु २० लाख, छक्कबहादुर लामाको सांसद् विकास कोषबाट रु १० लाख, स्वीट्जरल्याण्डको मिड सोलुसन फाउण्डेसनबाट रु १२ लाख ९२ हजार, नेपाल गिभ्स फाउण्डेसन र विल डे ग्रीज फाउण्डेसनको रु नौ लाख चार हजार १९२ गरी रु ६६ लाख ९६ हजार १९२ उठेको र अन्य रकम उधारोमा भवन निर्माण कार्य सम्पन्न भएको बताइएको छ ।

नयाँ वर्षको अवसरमा आयोजना गरिएको उद्घाटन कार्यक्रममा जिल्ला समन्वय समिति प्रमुख दानबहादुर रावत, सहायक प्रमुख जिल्ला अधिकारी दशरथ राई, जिल्लास्थित राजनीतिक दलका नेता, सञ्चारकर्मी, विद्यार्थी अभिभावक र भवन निर्माणमा संलग्न सहयोगीको सहभागिता रहेको हेड नेपालले जनाकारी दिएको छ ।

प्रकाशित समय १०:५१ बजे

प्रतिक्रिया दिनुहोस्

Gopal Dahal