Gopal Dahal

गृहपृष्ठ तीन हप्ताकी गर्भवती महिला पुनः भइन् गर्भवती, थाहा पाउनुस् कसरी जन्मिए दुई बच्चा

तीन हप्ताकी गर्भवती महिला पुनः भइन् गर्भवती, थाहा पाउनुस् कसरी जन्मिए दुई बच्चा

यो सुन्दा अचम्म लाग्छ होला । तर यो कुनै चमत्कारभन्दा कम होइन कि एक गर्भवती महिला पुनः दोस्रोपटक गर्भवती भइन् र उनले जुम्ल्याहा सन्तानलाई जन्म दिइन् । अचम्मको कुरा के छ भने यी दुई एकसाथ त जन्मिए तर ती बच्चाहरु गर्भमा आउनुको समय भने भिन्न थियो । पहिल्यै गर्भवती यी महिलाको तीन हप्तापछि दोस्रो सन्तान गर्भमा बसेको थियो ।

रेबेका रोबर्ट र उनका श्रीमान् राइस वीवर थुप्रै वर्षदेखि सन्तानको चाहनामा थिए । अघिल्लो वर्ष फर्टिलिटी मेडिकेशनपछि डाक्टरले यी दुईलाई उनीहरु निकै छिटो आमा–बुवा बन्न लागेको खबर सुनाए । यद्यपि, यो जोडीलाई थाहा थिएन कि उनीहरुको यो खुसी अचानक दोब्बर हुनेछ ।

डाक्टरले रेबेकालाई तेस्रो अल्ट्रासाउन्डमा अर्को एउटा बच्चा भएको खबर दिए । उनीहरु निकै अचम्ममा थिए किनभने रेबेकाको गर्भमा पहिले नै १२ हप्ता अर्थात् तीन महिनाको भ्रुण हुर्किरहेको थियो ।

रेबेकाले सोसल मिडियामा एउटा पोस्टमार्फत् भनिन्, ‘शुभ प्रभात अमेरिका, वास्तवमा यो निकै अचम्मित गरिदिने किसिमको कुरा थियो । मेरो गर्भमा एकको साटो दुई सन्तान थिए । डाक्टरले मलाई दुई शिशुबीच तीन हप्ताको अन्तर थियो भन्ने जानकारी दिए । यो डाक्टरले पनि बुझ्न सकिरहेका थिएनन् ।

महिलाको यो अवस्था थाहा पाएर डाक्टर आफैं पनि अचम्ममा थिए । सुरुमा उनलाई यसबारे केही थाहा नै थिएन । रोयल युनाइटेड अस्पतालमा ‘प्रेग्नेन्सी एण्ड फिमेल रिप्रोडक्टिव’ का विशेषज्ञ तथा रेबेकाका डाक्टर डेविड वाकरले भने, ‘रेबेकाको गर्भावस्था एक दुर्लभ घटना हो । यस्तो कतिपटक भयो, यसबारे कुनै जानकारी छैन ।’

रेबेकाको गर्भावस्थालाई सुपरफेटेशनको रुपमा डायगनोस गरिएको थियो । एउटा यस्तो अवस्था जहाँ पहिलो गर्भावस्थाका बेला दोस्रो पटक गर्भवती भएको पत्ता लाग्यो । यो स्थितिमा अण्डाशयबाट भिन्न भिन्न समयमा अण्डा रिलिज भएको थियो । ’

डाक्टर डेभिड वाकरले भने, ‘पहिला म यो सोचेर हैरान थिएँ कि दोस्रो बच्चालाई मैले कसरी देखिनँ ? तर पछि थाहा भयो कि यो मेरो गल्ती थिएन । यो एउटा दुर्लभ गर्भावस्था थियो जहाँ रेबेकाका दुबै जुम्ल्याहा बच्चामा तीन हप्ताको अन्तर थियो । दुबै बच्चा हेर्दा पनि साना–ठूला थिए ।’

डाक्टरले एक समय त पछि गर्भमा बसेको बच्चालाई बचाउन नसकिने पनि बताएका थिए । तर रेबेकाले कुनै चमत्कार झैं अघिल्लो वर्ष सेप्टेम्बरमा एक छोरा नूह र एक छोरी रोसिललाई जन्म दिइन् ।

यद्यपि, रोसिलाई जन्मिएपछि ९५ दिनसम्म एनआइसीयूमा राखिएको थियो जबकी नूहले तीन हप्ता एनआईसीयूमा बिताए । रेबेका आफ्ना दुई बच्चालाई सुपर ट्वीन्स भन्छिन् । उनीहरुलाई देखेर मलाई सधैं म भाग्यमानी छु भन्ने लाग्छ । रेबेकाको यो कहानी सोसल मिडियामा निकै भाइरल भइरहेको छ ।

 

प्रकाशित समय २०:३४ बजे

प्रतिक्रिया दिनुहोस्

Gopal Dahal